DILI, (TATOLI) – Diretór Nasionál Sentru Rádiu Komunidade (CRC-Sigla Portugés) ne’ebé tutela iha Sekretaria Estadu Komunikasaun Sosiál (SEKOMS), Luis Evaristo Soares, informa polítika governu iha tinan ida ne’e maka atu instala radio komunidade foun tolu iha área ne’ebé maka la hetan asesu ba informasaun.
“Polítika governu nian ne’ebé atu harii tan estasaun radio komunidade foun tolu iha tinan ne’e, liuliu iha área rurál sira ne’ebé komunidade la hetan asesu informasaun, liuhosi Rttl.Ep no imprensa sira seluk,” Luis Evaristo ba TATOLI,IP hafoin serimónia komemorasaun ba loron internasionál rádiu iha Timor-Leste ne’ebé organiza hosi Konsellu Imprensa (CI-Sigla Portugés), iha Largo-Lesidere, ohin.
Nia esplika, area hirak ne’ebé governu identifika ona atu instala rádiu komunidade maka iha Postu Administrativu Atsabe, Postu Administrativu Iliomar inklui Turiskai.
Intensaun atu harii rádiu komunidade tolu mak, fasilita komunidade iha area sira ne’e asesu informasaun, nu’udar direitu ida ne’ebé garante ona iha Konstituisaun Repúblika Demokrátika Timor-Leste (RDTL).
Ho hanoin hirak ne’e mak governu foti desizaun bazeia ba konsulta públiku ne’ebé halo kleur ona no bazeia ba asentimentu hirak ne’ebé diresaun Centro Rádiu Komunidade halo ona hodi tau katak área sira ne’ebé identifikadu nesesáriu duni atu estabelese rádiu komunidade.
Entretantu, polítika governu nian planeadu no programadu. Tanba ne’e ho orsamentu 2019 nian, governu sei ezekuta tuir mandatu konstitusionál, liu governu kontinua apoia rádiu komunidade ne’ebé eziste kleur ona, ho osan hamutuk mill U$ 240. Nune’e mós sei propoin osan ho valór mill U$ 700 atu haree infraestrutura foun ba rádiu komunidade ne’ebé atu instala.
Jornalista : Zezito Silva
Editór : Manuel Pinto
Fontes: https://tatoli.tl/2019/02/13/governu-sei-instala-radio-komunidade-tolu-tan/
