Metro FM, Atsabe — Sekretaria Estadu Komunikasaun Sosiál (SECOMS), liu husi Direksaun Nasionál Dezenvolvimentu Média (DNDM), halao formasaun jornalismu baziku ba jornalista no voluntáriu Rádio Komunidade Atsabe, hodi hasa’e kapasidade no koñesimentu sira kona-ba jornalismu, liuliu iha hakerek notísia no halo reportajen.
Formasaun ne’e hala’o durante semana ida, ho objetivu atu prepara rekursu umanu lokal, liuliu juventude voluntáriu sira, hodi bele jere no dezenvolve Rádio Komunidade Atsabe, nune’e bele hato’o informasaun ne’ebé loos, relevante no útil ba komunidade.
Diretór DNDM, Júlio Lopes, iha deklarasaun ba jornalista Rádio Metro FM iha loron 31 fulan Agostu 2026, hateten katak formasaun ne’e importante atu hasa’e koñesimentu partisipante sira kona-ba oinsá atu hakerek notísia no halo reportajen, liuliu kona-ba atividade no realidade komunidade iha Postu Administrativu Atsabe. Nia esplika katak, liu husi formasaun ne’e, partisipante sira sei aprende oinsá atu produz notísia no informasaun ne’ebé relevante, inklui atividade governu no atividade sira seluk ne’ebé importante ba komunidade. Bainhira jornalista no voluntáriu sira iha kapasidade jornalístika ne’ebé diak, Rádio Komunidade Atsabe bele sai meiu importante ida atu hato’o informasaun hosi komunidade ba públiku, no mos liga informasaun lokal ho nivel nasionál no territóriu tomak.
Formasaun jornalismu baziku ne’e hetan partisipasaun husi joventude voluntáriu hamutuk 15, ne’ebé mai hosi komunidade Atsabe.
Durante formasaun, partisipante sira aprende kona-ba konseitu no konteúdu jornalístiku, inklui notísia, reportajen, teknika hakerek notísia, no oinsá atu halo programa rádio ne’ebé liga ho atividade no nesesidade komunidade. Além ne’e, partisipante sira mós sei hetan koñesimentu kona-ba maneira jere Rádio Komunidade Atsabe tuir prosedimentu no prinsipiu sira ne’ebé aplika ba rádio komunidade sira iha Timor-Leste. Rádio Komunidade Atsabe harii bazeia ba nesesidade no interese komunidade lokal. Governu, liu husi SECOMS, harii rádio ne’e ho objetivu atu apoia komunidade iha asesu ba informasaun, no mos fasilita atu programa no atividade governu sira bele to’o diretamente ba komunidade, liuliu iha Postu Administrativu Atsabe. dehan Diretór
Iha tempu besik, sei hala’o lansamentu ofisiál Rádio Komunidade Atsabe. Enkuantu ne’e, ekipa tékniku no fasilitadór sira hosi SECOMS/DNDM kontinua prepara infraestrutura rádio no kapasidade rekursu umanu lokal. Rádio Komunidade Atsabe sei sai plataforma importante ida ba juventude no komunidade atu partisipa iha produsaun no fahe informasaun kona-ba dezenvolvimentu lokal, edukasaun, saúde, governasaun no atividade sira seluk ne’ebé relevante ba komunidade.
Ho kobertura ne’ebé planeadu atu to’o ba área sira iha Atsabe, Rádio Komunidade Atsabe sei fó benefísiu ba komunidade iha suku hitu iha área ne’e, liu husi informasaun ne’ebé direta, relevante no tuir nesesidade komunidade.
